Adat bak Poteu Meureuhom
Hukom bak Syiah Kuala
Qanun bak Putroe Phang
Reusam bak Lakseumana

Hukom Lillah sumpah bek
Hukom adèe pakèe bek
Hukom adat ikat bek
Hukom meujroh meupoh bek

Adat meukoh reubong
Hukom meukoh purieh
Adat barang gapat jeut ta khong
Hukom barang gapat hanjeut takieh

Hukom jroh nyang get peuteupat
Hukom adat tatueng bak raja
Hukom syariat tatueng lam kitab
Hukom akhirat syurga neuraka

Beuget adèe peutimang hukôm
Hukom adèe nyang get siasat
Meunyoe han adèe peutimang hukôm
Peutua kawôm geuungki le rakyat

Leumoh tanoh keubeue meukubang
Leumoh geudeubang digob panglima
Leumoh nanggroe sabèe dalam prang
Leumoh parang beusoe tan meulila

Leumoh hukom diato le pangkat
Leumoh adat jahe raja
Leumoh qanun tinggai bak kalam
Leumoh reusam gadoh budaya

Hak wajeb ubèe diplueng
Bagi ngon buleueng ubèe teuka
Hak buya di dalam krueng
Hak rimueng bak bineh rimba

Laen tajok laen tapeubloe
Bandum geutanyoe bak tapeue beda
Meunyo tajak hanjeut baranggasoe
Meunyoe tapeubloe bandum sama

Seubab musang binasa teubèe
Seubab asèe binasa raja
Seubab geusong binasa pade
Seubab kaphèe hanco agama

Minyeuk teubiet dalam peuneurah
Ie ranub mirah teubiet lam babah
Raja nyang adèe raja taseumah
Raja nyang jahèe raja tabantah

Meunyoe carong tapeuantok
Dalam bak jok diteubit saka
Meunyo hana carong tapeuantok
Siuroe suntok lalèe meudakwa

Kaya kriet, malem maksiet
Teumbon meuariet, pijuet meuapiet
Beu o seuiet, jeumot meugriet
Manyang meuliplip, meuseupet meuiet-iet

Hak bloe breueh bek bloe bajèe
Hak bloe gulèe bek tabloe ija

Bek peusaban kai ngon arèe
Bek peusarèe naleh ngon gunca

Pageu blang meubeunteung limong
Jeueneurob taglong leueng-leueng sideupa
Ceukop carat pageue, keubue ditamong
Deunda peukeunong bak ureueng po harta

Meunyoe get dalam hatèe
Lahe bak ie rupa
Meunyo brok dalam hatèe
Lahe bak peugah haba

Meunyoe get niet ngon hasad
Laot darat Tuhan peulara

Indatu Aceh (anonim)